Is-Sigill tal-Qrar... Minn Ottubru fuq NET TV

Minn Ottubru li ġej fuq Net Television ser tibda tintwera drama ġdida u oriġinali bl-isem ta’ Is-Siġill tal-Qrar bi Produzzjoni ta' Horizons Productions. Id-direzzjoni hija fl’idejn abbli ta' Ivan De Battista.

Interessanti huwa l-fatt li f’din id-drama ser jieħdu sehem aktar minn mitt attur u attriċi li uħud minnhom huma stabbiliti u oħrajn uċuħ ġodda. Fost l-atturi u l-attriċi stabbiliti nsibu lil Pat Mahoney, Simone De Battista, Marilyn Custo, Charles Sammut, Guido Fenech, Peter Borġ, Rennie Schembri, Rina Camilleri, Andre Penza, Joe Attard, Fabian Scerri De Carlo u Simone De Battista. Il-ġbid ta’ din id-drama beda xahrejn ilu u nistgħu ngħidu li miexi b’ritmu tajjeb.

Kif diġa semmejna il-kitba hija waħda oriġinali u ħarġet mill-pinna ta Jesmond Kris Buġeja. Huwa skript li jħallik bla nifs biex tkompli ssegwi l-andament ta’ din id-drama. Dawk kollha li ser isegwu Is-Siġill tal-Qrar ser jidħlu f'għanqbuta mimlija ntriċċi, mħabba u tradiment fost affarijiet oħra. Kenneth Mizzi, Producer ta' Horizons, qalilna li d-drama li qed itellgħu huma, hija waħda li għandha tingħoġob mhux biss minħabba l-intriċċi li jinqalgħu f’kull episodju iżda wkoll minħabba l-oriġinalita ta’ l-istorja. Gilbert Formosa, Co-Producer ta' Horizons, żied jgħid illi ser iżomm l-udjenza kull nhar ta' Tnejn fit-20.30 imwaħħla mas-sufan.

Il-protagonisti ewlenin tista tgħid li huma it-tlett karattri prinċipali; Dr Ralph Naudi li huwa kardjoloġista li jaħdem fi sptar u martu Tiffany. Huma ilhom miżżewġin erba’ snin iżda ftit wara jibda l-għawġ fiż-żwieġ tagħhom. Il-mara jkollha relazzjoni barra ż-żwieġ ma’ ġu r-raġel tagħha stess. Tiffany mingħaliha li Ralph ma jaf b’xejn x’inhu jiġri iżda hu jkun jaf b’kollox u jkompli jsaħħaħ il-ħsieb tiegħu b’aċċident li jinqala b’kumbinazzjoni.

F’din l-istorja jingħaqad patri li jkun għadu kif irritorna lejn Malta mill-art tal-missjoni għal ftit jiem biex ikun qrib t’ommu li tkun waslet f’tarf ħajjitha. Fr Emilio Bernardi jsir jaf lil Dr Ralph Naudi peress li dan ikun qiegħed jieħu ħsieb f’dik li hija kura lil ommu. Iżda ma’ l-andament ta’ l-istorja naraw x’inhi l-vera raġuni li Fr Emilio reġa ġie pajjiżhu u x’inhu l-iskop tas-Superjur tiegħu wara s-sejħa li għamillu biex jiġi lura Malta. Fr Emilio jibda joqgħod fil-kunvent, f’kamra fejn ebda patri ieħor ma jrid joqgħod fiha. Iżda għalfejn?? Ir-raġuni hija li f’din il-kamra aktar qabel ikun joqgħod patri barrani li kien għal btala u dan imut mewta misterjuża. Fr Emilio Bernardi jintalab jinvestiga l-mewt tiegħu. Jirnexxielu jsolvi l-każ Fr Emilio?

Għar-risposti segwi Is-Siġill tal-Qrar fuq Net Television minn Ottubru li ġej.